ಹೆಣ್ಣಾಗಿ ಭ್ರೂಣ

ವಿಕ್ರಯಕ್ಕಿವೆ ಹೆಣ್ಣು ಭ್ರೂಣಗಳು
ಕ್ರಯಿಸುವವರು ಇರುವರೇ ಸಕ್ರಿಯವಾಗಿ
ಕ್ರಯ ವಿಕ್ರಯಗಳ ನಡುವೆ ಚೌಕಾಶಿಯಾಗಿ
ಅಕ್ಕರೆಯ ಭ್ರೂಣದ ಒಡೆಯರಾಗಿ.



ಆ ಯುಗವು ಸಂದಿತು ಹೊಸ ಯುಗವು ಉದಿಸಿತು
ಯುಗ ಯುಗದ ಕಥೆಯು ಬದಲಾಯಿತು.
ಭ್ರೂಣ ಶೋಧನೆಯ ಹೊಸಹಾದಿ ತುಳಿದಿರಲು
ಬೇಡಿಕೆಯ ಮಜಲುಗಳು ತೋರಿಬರಲು.

ನಾಶ ಗೈದಿರಲು ಅಂದು ಪಳೆಯುಳಿಕೆಗಳು ಇಂದು
ವೇಷ ಧರಿಸಬೇಕಿನ್ನು ಜೀವ ಬೆರಳೆಣಿಕೆಗಿನ್ನು
ಹೆಣ್ಣು ಹೊನ್ನು ಮಣ್ಣು ಈ ಮೂರರಲಿ
ಉಳಿದಿರುವುದೇ ಎರಡು ಅಯ್ಕೆಗಿನ್ನು

ಹೆಣ್ಣು ಜನ್ಮವು ಸಾಕು ಎಂದಳಾ ಹೆಣ್ಣು
ಸಾಕುವೆವು ಎಂದರೂ ಎಲ್ಲಿ ಹೆಣ್ಣು ?
ಭ್ರೂಣಕ್ಕೆ ಬರಗಾಲ ಬಂತೆ ಈಗ
ಈ ಕಾಲ ಕಳೆಯಲಿ ಹರಸಿ ಬೇಗ.